तुतीकोरिन – करोना काळातील लॉकडाऊनच्या नियमांचे उल्लंघन केल्याच्या ठपक्याखाली अटक करण्यात आलेल्या बाप-लेकाच्या कोठडीतील मृत्यूप्रकरणी एक अत्यंत मोठा व ऐतिहासिक निकाल समोर आला आहे. तुतीकोरिन जिल्ह्यातील सथानकुलम येथे घडलेल्या या धक्कादायक घटनेत मदुराई न्यायालयाने तब्बल नऊ पोलीस अधिकाऱ्यांना फाशीची शिक्षा सुनावली आहे. या निकालामुळे देशभरात खळबळ उडवून देणाऱ्या आणि न्यायव्यवस्थेवरचा विश्वास अधिक दृढ करणाऱ्या या प्रकरणाला अखेर सहा वर्षांनंतर न्याय मिळाला आहे.
१९ जून २०२० रोजी संपूर्ण देशात करोना संसर्गामुळे कडक लॉकडाऊन लागू होता. याच काळात सथानकुलम येथे राहणारे व्यावसायिक पी. जयराज आणि त्यांचा मुलगा बेन्निक्स यांना पोलिसांनी ताब्यात घेतले. ठरवून दिलेल्या वेळेपेक्षा अधिक काळ आपले मोबाईल ॲक्सेसरीजचे दुकान सुरू ठेवल्याचा त्यांच्यावर आरोप होता. या किरकोळ कारणावरून त्यांना पोलीस ठाण्यात नेण्यात आले. मात्र, तिथे त्यांच्यावर अत्यंत कठोर कारवाई करण्यात आली.
केंद्रीय अन्वेषण ब्युरो म्हणजेच सीबीआय ने केलेल्या सखोल तपासातून अनेक धक्कादायक गोष्टी उघडकीस आल्या. या बाप-लेकाला रात्रभर कोठडीत बेदम मारहाण करण्यात आली होती. हा प्रकार अचानक घडलेला नसून तो पूर्णपणे पूर्वनियोजित होता, असे तपासात निष्पन्न झाले. रात्रभर झालेल्या या शारीरिक छळामुळे दोघांना गंभीर दुखापत झाली आणि मोठ्या प्रमाणावर रक्तस्त्राव झाला, ज्यामुळे त्यांचा कोठडीतच दुर्दैवी मृत्यू ओढवला.
या घटनेनंतर केवळ राज्यातच नव्हे, तर संपूर्ण देशभरात संतापाची लाट उसळली होती. पोलीस कोठडीतील अधिकारांच्या गैरवापराचा आणि हिंसाचाराचा मुद्दा अत्यंत प्रकर्षाने ऐरणीवर आला. सर्वसामान्यांकडून न्यायाची जोरदार मागणी होऊ लागल्यामुळे, प्रकरणाचे गांभीर्य लक्षात घेत तपास सीबीआय कडे सोपवण्यात आला होता. सीबीआय ने न्यायालयात युक्तिवाद करताना हा गुन्हा अत्यंत गंभीर आणि जाणीवपूर्वक केलेला असल्याचे सिद्ध केले व आरोपींना कठोर शिक्षेची मागणी केली.
न्यायालयाने ही मागणी ग्राह्य धरत या गुन्ह्यातील नऊ पोलिसांना दोषी ठरवले आहे. यामध्ये पोलीस निरीक्षक एस. श्रीधर, उपनिरीक्षक पी. रघु गणेश आणि के. बालकृष्णन यांचा समावेश आहे. याशिवाय मुख्य हवालदार एस. मुरुगन, ए. समदुरई तसेच हवालदार एम. मुथुराज, एस. चेल्लादुराई, एक्स. थॉमस फ्रान्सिस आणि एस. वेलुमुथु यांनाही न्यायालयाने फाशीची शिक्षा ठोठावली आहे. कायदा आणि सुव्यवस्थेचे रक्षण करण्याची जबाबदारी असलेल्यांनीच स्वतः अधिकारांचा गैरवापर केल्याने त्यांना ही सर्वात मोठी शिक्षा देण्यात आली आहे.
