सोलापूर ( प्रतिनिधी )
महाराष्ट्र राज्यासह संपूर्ण देशभरात शिक्षक म्हणून सेवेत कार्यरत असलेल्या शिक्षकांना सेवा संरक्षण मिळाले पाहिजे हिच आपली भूमिका असल्याची नि:संदिग्ध ग्वाही खा. कु. प्रणिती शिंदे यांनी दिली.
महाराष्ट्र राज्य प्राथमिक शिक्षक समितीच्या सोलापूर जिल्हा शाखेच्या वतीने आज सायंकाळी उशिरा या प्रश्नी खा. प्रणिती.शिंदे यांची भेट घेऊन याबाबतीत निवेदन देऊन चर्चा केली. दि. १ सप्टेंबर २०२५ रोजी सुप्रीम कोर्टाने दिलेल्या निवड्यामुळे यामुळे इयत्ता १ ली ते ८ वी साठी ज्ञानदान करणाऱ्या शिक्षकांना टीईटी सक्तीची करण्यात आली आहे. या पार्श्वभूमीवर केंद्र सरकारने RTE २००९ मधील कलम २३ (२ ) मध्ये व दुरुस्ती करावी व NCTE अधिसूचनेत बदल करुन कार्यरत शिक्षकांना सेवा संरक्षण द्यावे अशी मागणी यावेळी करण्यात आली.
यावेळी खा. शिंदे यांनी यापूर्वी केंद्रीय शिक्षणमंत्री धर्मेंद्र प्रधान यांना पत्रव्यवहार केला असून २० जुलै पासून सुरु होणाऱ्या संसदेच्या पावसाळी अधिवेशनात या प्रश्नी आवाज उठवणार असून यासाठी आवश्यक तो पाठपुरावा करण्याची ग्वाही दिली.
यावेळी झालेल्या चर्चेत शिक्षक समितीचे राज्य उपाध्यक्ष राजन सावंत, जिल्हाध्यक्ष अमोघसिद्ध कोळी, राज्य प्रसिद्धीप्रमुख डॉ. रंगनाथ काकडे, शिक्षक नेते सुरेश पवार, कन्नड विभागाचे राज्यप्रमुख बसवराज गुरव, सरचिटणीस शरद रुपनवर, ज्येष्ठ नेते हमजूभाई मुलाणी इत्यादी पदाधिकारी व सहकारी कार्यकर्ते उपस्थित होते.
