मुंबई- सध्या भारतात प्रामुख्याने दोन विषयांवर मोठी चर्चा सुरू आहे. पहिला विषय म्हणजे जगात निर्माण झालेली युद्धजन्य परिस्थिती आणि दुसरा विषय म्हणजे अशोक खरात प्रकरण. या भोंदूबाबाचे पितळ जगासमोर उघडे पडल्यानंतर पोलीस प्रशासनाने तातडीने कारवाई करत त्याला बेड्या ठोकल्या आहेत. या प्रकरणाच्या चौकशीदरम्यान अनेक धक्कादायक बाबी उघडकीस आल्या. आजच्या प्रगत आणि विज्ञानवादी युगातही अनेक उच्चशिक्षित लोक अशा भोंदूबाबांच्या आहारी जाऊन त्यांच्या चुकीच्या कृत्यांना प्रोत्साहन देत आहेत, ही अत्यंत दुर्दैवी बाब समोर आली आहे.
स्वतःकडे दैवी शक्ती असल्याचा दावा करत व सर्व संकटांमधून मुक्त करण्याचे खोटे आश्वासन देत, अशोक खरात याने अनेक महिलांचे मानसिक व शारीरिक शोषण केल्याचे तपासात निष्पन्न झाले आहे. अनेक महिला अंधविश्वासापोटी डोळ्यांवर पट्टी बांधल्याप्रमाणे त्याला अधीन झाल्या होत्या. या भोंदूबाबाच्या काही आक्षेपार्ह क्लिप्स व्हायरल झाल्यानंतर त्याचे हे निंदनीय सत्य समोर आले. विशेष म्हणजे, राजकीय क्षेत्रातील अनेक मोठी नावेदेखील या भोंदूबाबाच्या प्रभावाखाली होती, हे उघड झाले आहे.
या प्रकरणाचा तपास जसजसा पुढे जात आहे, तसतशी नवी खळबळजनक माहिती समोर येत आहे. यावर समाजातून तीव्र प्रतिक्रिया उमटत असतानाच, प्रसिद्ध अभिनेत्री सोनाली कुलकर्णी यांनीही समाजमाध्यमांवर एक सविस्तर पोस्ट लिहून आपला तीव्र संताप व्यक्त केला आहे. त्यांनी समाजाला अंधश्रद्धेतून जागे होण्याचे आवाहन केले आहे. आपल्या पोस्टमध्ये त्या म्हणतात की, आता तरी आपण श्रद्धा आणि अंधश्रद्धा यातील फरक समजून घेऊया. महिलांवर होणारे गैरवर्तन, आर्थिक फसवणूक, भावनिक छळ आणि यामागील भयंकर दांभिकता अतिशय संतापजनक आणि मन सुन्न करणारी आहे.
त्या पुढे असा थेट सवाल करतात की, अजूनही आपण असेच म्हणणार का की केवळ आमच्याच धर्मात अंधश्रद्धा का दिसते? आपल्या उंबरठ्यावरील घाण आपण स्वतःहून साफ करायला नको का? आपली ती ‘पवित्र अस्वच्छता’ आणि दुसऱ्याची ती ‘दुर्गंधी’ हा विचार आता सोडायला हवा. महाराष्ट्र राज्यात आणि आपल्या भवतालीच हे सर्व घडत आहे. आपण ठगले जात आहोत, त्यामुळे आता तरी जागे होऊया, असे त्या स्पष्टपणे सांगतात. यावर अनेक सोशल मीडिया युजर्सनीही आपली मते नोंदवली असून, अशा प्रवृत्ती लोकांच्या विश्वासाचा कसा गैरफायदा घेतात यावर चिंता व्यक्त केली आहे.
