पुणे – नाशिक येथील वादग्रस्त कथित बाबा अशोक खरात याचा चार्टर्ड अकाउंटंट (सीए) असलेल्या प्रकाश पोफळे याच्या नावे पुणे शहरातील अतिशय उच्चभ्रू आणि महागड्या समजल्या जाणाऱ्या कोरेगाव पार्क परिसरात अवाढव्य संपत्ती असल्याचे आता पोलिसांच्या तपासात उघडकीस आले आहे. वर्ष २०२४ मध्ये या सीएने याच परिसरातील लेन नंबर तीन मध्ये मोठ्या प्रमाणावर मालमत्ता खरेदी केल्याचे समोर आले आहे. पोलिसांच्या हाती लागलेल्या ताज्या पुराव्यांनुसार, या बेहिशोबी संपत्तीमध्ये तब्बल १८ रो-हाऊस आणि नाशिक तसेच आजूबाजूच्या परिसरातील सुमारे ४९ गुंठे मोकळ्या जमिनीचा समावेश असल्याचे स्पष्ट झाले आहे. खरेदीच्या कागदोपत्री व्यवहारात या संपूर्ण मालमत्तेची किंमत १९ कोटी ५६ लाख रुपये इतकी दाखवण्यात आली आहे. परंतु, कोरेगाव पार्क मधील जमिनीचे गगनाला भिडलेले भाव आणि तिथे असणारी बड्या उद्योगपतींची घरे पाहता, प्रत्यक्ष बाजारात या खरेदीचे मूल्य तब्बल शंभर कोटींपेक्षा अधिक असण्याची दाट शक्यता वर्तवली जात आहे.
ही धक्कादायक माहिती समोर आल्यानंतर एका सीएकडे इतकी प्रचंड रक्कम आली कुठून, असा मोठा आणि गंभीर प्रश्न आता निर्माण झाला आहे. अशोक खरात स्वतःच्या सीएच्या माध्यमातून आपला काळा पैसा पांढरा करत होता का आणि या मोठ्या व्यवहाराशी त्याचा थेट संबंध आहे का, असा दाट संशय आता व्यक्त केला जात आहे. ‘शिवनिका’ ट्रस्ट आणि इतर अनेक संशयास्पद व्यवहारांमधून गोळा झालेला पैसा या अतिमहागड्या मालमत्तांमध्ये वळवण्यात आल्याचा प्राथमिक अंदाज पोलिसांकडून वर्तवण्यात येत आहे. या सर्व काळ्या पैशांचे आणि गुंतवणुकीचे मुख्य नियोजन सीए प्रकाश पोफळे हाच करत असल्याची माहिती तपासात पुढे येत आहे. या प्रकरणाच्या अनुषंगाने सीएशी संपर्क साधण्याचा प्रयत्न करण्यात आला, परंतु त्यांच्याकडून कोणताही प्रतिसाद मिळू शकलेला नाही.
सध्या या संपूर्ण प्रकरणाची सखोल चौकशी विशेष तपास पथक (SIT) करत आहे. या सर्व मालमत्तांची नेमकी खरेदी कधी करण्यात आली, त्यासाठी वापरण्यात आलेला पैसा कोणत्या मार्गाने आला आणि यामध्ये काही बेनामी व्यवहार दडलेले आहेत का, याचा कसून तपास आता यंत्रणांकडून सुरू आहे. एका भोंदू व्यक्तीच्या आर्थिक गैरव्यवहारांची व्याप्ती किती मोठी असू शकते, हेच या उघड झालेल्या संपत्तीवरून स्पष्ट होत असून या चौकशीतून आणखी मोठे खुलासे होण्याची शक्यता आहे.
