शैक्षणिक
अक्कलकोटचे डॉ. धानय्य कौटगीमठ यांच्या मार्गदर्शनाखाली तब्बल ३०९ विद्यार्थी के-सेट परीक्षेत उत्तीर्ण
अक्कलकोट : ( प्रतिनिधी ) येथील के.एल.ई. मंगरूळे हायस्कूलचे प्रगतशील व अभ्यासू शिक्षक डॉ. धानय्या कौटगीमठ यांच्या नि:स्वार्थ मार्गदर्शनाखाली कर्नाटक सहाय्यक प्राध्यापक पात्रता परीक्षा (के सेट) २०२५ मध्ये तब्बल ३०९ विद्यार्थी यशस्वी झाले आहेत.
कर्नाटक परीक्षा प्राधिकरण (के इ ए) मार्फत २ नोव्हेंबर २०२५ रोजी घेण्यात आलेल्या के सेट परीक्षेचा निकाल अवघ्या १९ दिवसांत जाहीर करण्यात आला. ही परीक्षा युजीसीच्या मान्यतेने आयोजित करण्यात आली होती.
देशातील विविध राज्यांमध्ये सेट नेट टी इ टी या परीक्षा तब्बल ७९ वेळा उत्तीर्ण होऊन डॉ. कौटगीमठ यांनी केलेला जागतिक विक्रम म्हणजे अनेक विद्यार्थ्यांसाठी प्रेरणेचे दीपस्तंभ ठरला आहे. या परीक्षांचा प्रचंड अनुभव, सखोल ज्ञान आणि उच्च दर्जाचे कौशल्य सर्वसामान्य विद्यार्थ्यांपर्यंत पोहोचावे या हेतूने ते यू ट्यूब मार्गे पूर्णपणे मोफत मार्गदर्शन करत आहेत.
यंदाच्या के सेट निकालात विविध स्तरातील—गोर-गरीब कामगार, शिपाई, सिक्युरिटी गार्ड, पेट्रोल पंप कर्मचारी, महिला, विद्यार्थी, शिक्षक, विनाअनुदानित प्राध्यापक, दिव्यांग, सैनिक, पोलीस कर्मचारी, कोर्ट कर्मचारी, वकील, क्लर्क, बस कंडक्टर—अशा अनेक सामाजिक घटकांतील विद्यार्थ्यांनी सरांच्या मार्गदर्शनाचा लाभ घेऊन उल्लेखनीय यश प्राप्त केले आहे.
अक्कलकोट, सोलापूर, सांगली यांसह हैदराबाद, केरळ, तमिऴनाडू आणि कर्नाटकातील ३० जिल्ह्यांमधील विद्यार्थी — बेंगळुरू, म्हैसूर, धारवाड, मंगळुरू, कोलार, चित्रदुर्ग, विजयपूर, कलबुर्गी, बीदर — तसेच इंग्रजी, कन्नड, कॉमर्स, इतिहास, राज्यशास्त्र, अर्थशास्त्र इत्यादी विविध विषयातील उमेदवारांनी डॉ. कौटगीमठ यांच्या व्हिडिओ व्याख्यानांचा लाभ घेतला आहे.
यू ट्यूब वर डॉ. धनय्य कौटगीमठ सरांचे ५२ हजारांहून अधिक विद्यार्थी लाभार्थी असून सुमारे १३०० हून अधिक दर्जेदार व्हिडिओ मराठी, कन्नड आणि इंग्रजी भाषेत उपलब्ध आहेत.
अक्कलकोट तालुक्यातील प्रा. अश्विनी (वाघधारी), प्रा. श्रीशैल चानकोटगी (तोलनूर), प्रा. इकरा पीरजादे पाटील, प्रा. विनायक कलशेट्टी (अक्कलकोट), प्रा. प्रीती विरादे (भंडार कवठा) यांनीही या परीक्षेत यश मिळवले आहे.
विद्यार्थ्यांचे प्रेरणादायी अनुभव
चौकट – : प्रा. अरुण, बेंगळुरू (पेट्रोल पंप कर्मचारी)
“अक्कलकोटचे डॉ. डी.के. सरांचे व्हिडिओ मी दररोज पाहून मन लावून नोट्स घेतल्या. सरांनी यू ट्यूब वर दिलेली सविस्तर माहिती माझ्यासाठी अत्यंत उपयुक्त ठरली. त्याचा पूर्ण फायदा मला झाला आणि मी के सेट परीक्षा उत्तीर्ण झालो.
चौकट -: प्रा. रेवण, मैसूर (सिक्युरिटी गार्ड)
“मी मैसूर सँडल फॅक्टरीमध्ये सिक्युरिटी गार्ड म्हणून रात्रीची ड्युटी करतो. डॉ. धनय्य कौटगीमठ सरांची प्रेरणादायी व्हिडिओ मी ड्युटीच्या वेळेत पाहत असे. त्या व्हिडिओंनी मला चिकाटी दिली आणि जिद्दीने अभ्यास करून मी अखेर के सेट पास झालो.
चौकट – : प्रा. ज्योती (दिव्यांग विद्यार्थीनी)
“के सेट परीक्षेपूर्वी माझ्या वडिलांचे हार्ट अटॅकने निधन झाले. घरची अत्यंत बिकट आर्थिक परिस्थिती—मी दिव्यांग; आईचा ज्येष्ठ नागरिक भत्ता आणि माझा ८०० रुपयांचा दिव्यांग भत्ता—यावरच मी शिक्षणाचा खर्च चालवला. अचानकपणे धानय्य सरांचे व्हिडिओ पाहायला मिळाले. ते नियमित पाहून आत्मविश्वास वाढला आणि तिसऱ्या प्रयत्नात मी परीक्षा उत्तीर्ण झाले.
आजपर्यंत १३५८ विद्यार्थी डॉ. धानय्य कौटगीमठ सरांच्या मोफत ऑनलाइन मार्गदर्शनामुळे सेट नेट टी इ टी परीक्षा उत्तीर्ण झाले असून ही समाजोपयोगी सेवा अनेकांच्या आयुष्यात आशेचा किरण बनली आहे.
