नवी दिल्ली – महिला आरक्षण विधेयकाच्या संदर्भात पंतप्रधान नरेंद्र मोदी यांनी नुकत्याच केलेल्या वक्तव्यावरून आता काँग्रेस पक्षाने आक्रमक पवित्रा घेतला आहे. काँग्रेस अध्यक्ष मल्लिकार्जुन खर्गे यांनी सत्ताधाऱ्यांवर कडाडून टीका करत, पंतप्रधानांनी आपल्या सर्वोच्च पदाचा आणि अधिकृत व्यासपीठाचा वापर केवळ राजकीय हेतूने विरोधकांवर आरोप करण्यासाठी आणि दिशाभूल करण्यासाठी केल्याचा दावा केला आहे. पंतप्रधानांच्या संपूर्ण भाषणात महिला सक्षमीकरणापेक्षा केवळ काँग्रेस पक्षाचाच द्वेष अधिक पाहायला मिळाला, असा थेट हल्लाबोल त्यांनी केला.
सोशल मीडिया प्लॅटफॉर्म ‘एक्स’ (ट्विटर) वर आपली सविस्तर भूमिका मांडताना मल्लिकार्जुन खर्गे यांनी निदर्शनास आणून दिले की, पंतप्रधानांनी त्यांच्या भाषणादरम्यान तब्बल ५९ वेळा काँग्रेस पक्षाचा उल्लेख केला, मात्र महिलांच्या प्रश्नांवर त्यांनी सोयीस्कर मौन बाळगले. यातूनच त्यांची खरी प्राथमिकता काय आहे, हे स्पष्ट होते असे ते म्हणाले. गेल्या १२ वर्षांच्या कार्यकाळात कोणतीही ठोस कामगिरी न करता आल्यामुळे निर्माण झालेल्या नैराश्यातूनच सत्ताधाऱ्यांकडून आता लोकशाही आणि संविधानाचा अवमान केला जात असल्याचा गंभीर आरोप त्यांनी केला. विशेष म्हणजे, २०१० मध्ये राज्यसभेत महिला आरक्षणाचे विधेयक पहिल्यांदा काँग्रेसनेच मंजूर केले होते, या ऐतिहासिक घटनेची आठवणही त्यांनी यावेळी करून दिली.
सध्या अनेक राज्यांमध्ये महिलांच्या सुरक्षेचा प्रश्न ऐरणीवर आला आहे. हाथरस, उन्नाव येथील गंभीर घटना आणि हरियाणातील महिला कुस्तीपटूंना मिळालेली अपमानास्पद वागणूक या ज्वलंत मुद्द्यांवर पंतप्रधान काहीच का बोलत नाहीत? असा रोकडा सवाल विचारण्यात आला आहे. तसेच, बिल्किस बानो प्रकरणात गुन्हेगारांना पाठीशी घालणे आणि त्यांची मुक्तता करणे, हीच सरकारची महिला सन्मानाची व्याख्या आहे का? असा संतप्त प्रश्न विचारून सरकारला कोंडीत पकडण्याचा प्रयत्न झाला आहे.
या पार्श्वभूमीवर काँग्रेस पक्षाने तीन प्रमुख अटी सरकारसमोर ठेवल्या आहेत. पहिली अट म्हणजे, सध्याच्या ५४३ लोकसभा मतदारसंघांमध्ये त्वरित ३३ टक्के महिला आरक्षण लागू करणारे विधेयक आणावे. दुसरी मागणी म्हणजे, महिला आरक्षण आणि परिसीमन (मतदारसंघ पुनर्रचना) यांची एकमेकांशी सांगड घालणे तत्काळ थांबवावे, कारण हा केवळ राजकीय फायद्यासाठी नकाशा बदलण्याचा डाव आहे. आणि तिसरी सर्वात महत्त्वाची अट म्हणजे, देशातील १४० कोटी जनतेची दिशाभूल केल्याप्रकरणी पंतप्रधानांनी जाहीर माफी मागावी.
दरम्यान, काँग्रेसचे ज्येष्ठ नेते जयराम रमेश यांनीही पंतप्रधानांच्या या भाषणाला ‘राष्ट्राला उद्देशून केलेला संदेश’ न मानता, ते एक ‘तणावाखाली दिलेले भाषण’ (डिस्ट्रेस एड्रेस) असल्याचे म्हटले आहे. जनधन, आधार योजना आणि जीएसटी यांसारख्या मोठ्या योजना मूळतः काँग्रेसच्याच संकल्पना असल्याचे त्यांनी स्पष्ट केले. इंदिरा गांधी यांनी केलेले बँकांचे राष्ट्रीयीकरण, मनमोहन सिंग यांच्या काळातील आधार योजना आणि राजीव गांधी यांनी रोवलेला डिजिटल इंडियाचा पाया, या सर्व गोष्टींचे सध्याचे सरकार केवळ स्वतःच्या नावावर मार्केटिंग करत असल्याची जोरदार टीका जयराम रमेश यांनी केली.
