खरेदीसाठी नागरिकांची झुंबड; पणत्या, आकाशकंदील, विद्युत रोषणाई आणि पूजेच्या साहित्याला मोठी मागणी
नायगाव / नांदेड (- सय्यद अजीम नरसीकर )प्रकाश, मांगल्य आणि आनंदाचा संदेश देणाऱ्या दीपावली सणाचे आगमन अवघ्या दोन दिवसांवर येऊन ठेपल्याने नायगाव आणि नरसी शहरांतील बाजारपेठा उत्साहाने फुलल्या आहेत. सणाच्या पार्श्वभूमीवर मुख्य बाजारपेठांमध्ये खरेदीसाठी नागरिकांची मोठी गर्दी होत असून, सर्वत्र दीपावलीच्या स्वागताची लगबग पाहायला मिळत आहे. रंगीबेरंगी आकाशकंदील, आकर्षक विद्युत रोषणाई आणि विविध सजावटीच्या साहित्याने बाजारपेठांना उत्सवी स्वरूप प्राप्त झाले आहे.
दीपावली म्हणजे अंधारावर प्रकाशाचा, निराशेवर आनंदाचा आणि अमंगलावर मांगल्याचा विजय मानणारा भारतीय संस्कृतीतील महत्त्वाचा सण. या सणाच्या स्वागतासाठी घराघरांत स्वच्छता, रंगरंगोटी आणि सजावटीची तयारी अंतिम टप्प्यात आली आहे. लक्ष्मीपूजनासाठी लागणारे साहित्य, मातीचे पारंपरिक दिवे, पणत्या, रांगोळी, तोरणे, आकाशकंदील, विद्युत माळा तसेच पूजेच्या साहित्याच्या खरेदीसाठी महिला आणि पुरुषांची बाजारपेठेत गर्दी होत आहे.
विशेषतः पारंपरिक मातीच्या पणत्या आणि विविध आकर्षक आकारांतील आकाशकंदिलांना ग्राहकांची पसंती मिळत आहे. बदलत्या काळानुसार बाजारपेठेत आधुनिक विद्युत सजावटीच्या साहित्याचेही विविध प्रकार उपलब्ध झाले आहेत. लहान मुलांमध्ये फटाके, कंदील आणि आकर्षक सजावटीच्या वस्तूंचे विशेष आकर्षण दिसून येत आहे.
दरम्यान, सणानिमित्त व्यापाऱ्यांनीही ग्राहकांच्या मागणीनुसार विविध प्रकारचे साहित्य दुकानांमध्ये उपलब्ध करून दिले आहे. सकाळपासून रात्रीपर्यंत बाजारपेठेत सुरू असलेली खरेदीची लगबग, दुकानांची रोषणाई आणि नागरिकांची वर्दळ यामुळे नायगाव व नरसी शहरांत दीपावलीचा उत्साह ओसंडून वाहत आहे.
एकंदरीत, दिव्यांच्या प्रकाशाने घरोघरी आनंद, सुख-समृद्धी आणि मांगल्य नांदावे, या शुभभावनेतून नायगाव व नरसीसह संपूर्ण तालुका दीपावलीच्या स्वागतासाठी सज्ज झाला असून, बाजारपेठेतील वाढती गर्दी स्थानिक व्यापाऱ्यांनाही उत्साह आणि आर्थिक उलाढालीची आशा देणारी ठरत आहे.
