गुरुपौर्णिमेचे औचित्य साधत गटशिक्षणाधिकारी सतीश दर्शनवाड यांची शिक्षकांना अनोखी भेट
नायगाव तालुक्यातील सर्व शिक्षकांच्या सेवा पुस्तिका अद्ययावत; वार्षिक वेतनवाढीची प्रक्रिया पूर्ण, शिक्षण क्षेत्रातून उपक्रमाचे सर्वत्र स्वागत
नायगाव / नांदेड ( प्रतिनिधी : )-
गुरुपौर्णिमा म्हणजे गुरुजनांविषयी कृतज्ञता व्यक्त करण्याचा दिवस. या दिवसाचे औचित्य साधत नायगाव तालुक्याचे गटशिक्षणाधिकारी सतीश दर्शनवाड यांनी शिक्षकांप्रती असलेली आत्मीयता आणि प्रशासनातील कार्यतत्परता यांचे अनोखे दर्शन घडविले. तालुक्यातील सर्व शिक्षकांच्या वार्षिक वेतनवाढीची प्रक्रिया पूर्ण करून त्यांच्या सेवा पुस्तिका अद्ययावत करण्याचे महत्त्वपूर्ण काम गुरुपौर्णिमेच्या दिवशी पूर्णत्वास नेण्यात आले. प्रशासनाच्या दृष्टीने अत्यंत महत्त्वाचे मानले जाणारे हे काम वेळेत पूर्ण करून गटशिक्षणाधिकारी दर्शनवाड यांनी शिक्षकांना एक अर्थपूर्ण आणि संस्मरणीय भेट दिली.
दि. २९ जुलै रोजी बुधवारी आयोजित करण्यात आलेल्या कार्यक्रमात तालुक्यातील शिक्षकांच्या सेवाविषयक नोंदी अद्ययावत झाल्याची माहिती देण्यात आली. अनेक शिक्षकांसाठी सेवा पुस्तिका अद्ययावत करणे आणि वार्षिक वेतनवाढीची प्रक्रिया वेळेत पूर्ण होणे ही अत्यंत महत्त्वाची बाब मानली जाते. या पार्श्वभूमीवर गटशिक्षणाधिकारी सतीश दर्शनवाड यांनी संपूर्ण यंत्रणेच्या समन्वयातून हे काम पूर्ण करून प्रशासनातील कार्यक्षमतेचा आदर्श निर्माण केला.
या कार्यक्रमास नायगावच्या तहसीलदार डॉ. धम्मप्रिया गायकवाड, नायगाव नगरपंचायतीच्या मुख्याधिकारी गांधाली पवार, तालुक्यातील सर्व शिक्षण विस्तार अधिकारी, केंद्रप्रमुख, पदोन्नत मुख्याध्यापक, मुख्याध्यापक तसेच शिक्षक मोठ्या संख्येने उपस्थित होते. उपस्थित मान्यवरांनी या उपक्रमाचे कौतुक करत, शिक्षकांच्या सेवाविषयक प्रश्नांना प्राधान्य देणारी ही प्रशासनाची सकारात्मक भूमिका असल्याचे मत व्यक्त केले.
कार्यक्रमाच्या शेवटी गटशिक्षणाधिकारी सतीश दर्शनवाड यांनी उपस्थित सर्व शिक्षक व गुरुजनांना गुरुपौर्णिमेच्या शुभेच्छा देत अल्पोपहाराचे आयोजन केले. गुरुजनांप्रती आदर व्यक्त करण्याबरोबरच त्यांच्या सेवेशी संबंधित महत्त्वाचे काम पूर्ण करून गुरुपौर्णिमा साजरी करण्याचा हा उपक्रम उपस्थितांच्या विशेष पसंतीस उतरला.
प्रशासनातील संवेदनशीलता, शिक्षकांविषयीची आत्मीयता आणि कामकाजातील पारदर्शकता यांचा सुंदर संगम या उपक्रमातून दिसून आला. त्यामुळे नायगाव तालुक्यातील या अभिनव उपक्रमाची शिक्षण क्षेत्रात तसेच जिल्हाभरात प्रशंसा होत असून, गुरुजनांप्रती कृतज्ञता व्यक्त करण्याचा हा आदर्शवत प्रयत्न असल्याच्या भावना व्यक्त केल्या जात आहेत.
