पुण्यातील शिरूरमध्ये भररस्त्यात महिलेची प्रसुती , डॉक्टर सुनिता पोटे यांच्यामुळे वाचले बाळाचे प्राण
पुणे – आजच्या काळात माणुसकी हरवत चालली आहे असे आपण नेहमी ऐकतो , मात्र पुणे जिल्ह्यातील शिरूर तालुक्यात घडलेल्या एका घटनेने हे विधान पूर्णपणे खोटे ठरवले आहे. येथील जोशीवाडी भागात राहणाऱ्या एका गरीब गरोदर महिलेला अचानक पोटात तीव्र वेदना होऊ लागल्या. त्यामुळे ती पायीच शिरूर ग्रामीण रुग्णालयाच्या दिशेने उपचारासाठी निघाली होती. परंतु चालत असताना निर्माण प्लाझा या परिसरापर्यंत पोहोचताच तिच्या प्रसुती कळा असह्य झाल्या. वेदना एवढ्या वाढल्या की तिला पुढे एक पाऊलही टाकणे शक्य झाले नाही आणि ती भररस्त्यातच खाली बसली. काही समजण्याच्या आतच या महिलेने रस्त्यावर एका बाळाला जन्म दिला.
हा सर्व प्रकार पाहताच आसपासच्या परिसरातील महिलांनी क्षणाचाही विलंब न लावता मदतीसाठी धाव घेतली. रस्त्यावरील या आपत्कालीन परिस्थितीत कोणी स्वतःचा स्कार्फ काढून आडोसा निर्माण केला , तर कोणी शेजारच्या घरातून साड्या आणून या महिलेला सुरक्षित वाटावे यासाठी काही मिनिटांतच एक छोटीशी जागा तयार केली. सर्व महिला तिला मानसिक धीर देत होत्या. याच वेळी घटनेची माहिती मिळताच नगरसेविका डॉक्टर सुनिता पोटे आणि पूजा पोटावळे यांनी तातडीने घटनास्थळी धाव घेतली.
त्याच दरम्यान सर्वांच्या काळजाचा ठोका चुकवणारी एक गोष्ट घडली. जन्मलेले बाळ अजिबात रडत नव्हते. त्यामुळे उपस्थित सर्वांमध्येच घबराट आणि भीतीचे वातावरण पसरले. अशा नाजूक क्षणी डॉक्टर सुनिता पोटे यांनी आपले प्रसंगावधान राखले आणि तातडीने बाळाची तपासणी करून आवश्यक ती वैद्यकीय मदत उपलब्ध करून दिली. त्यांच्या या प्रयत्नांमुळे काही क्षणांतच बाळाने रडण्यास सुरुवात केली. बाळाचा आवाज ऐकताच तिथे उपस्थित असलेल्या प्रत्येकाने सुटकेचा निःश्वास सोडला आणि तणावाचे रूपांतर एका मोठ्या आनंदात झाले.
तिथे उपस्थित असलेल्या नागरिकांनी टाळ्यांचा कडकडाट करत आनंद व्यक्त केला. ‘ निर्माण प्लाझावर निर्माणचा जन्म झाला ‘ , असे म्हणत उपस्थितांनी हा सुखद प्रसंग साजरा केला. या संपूर्ण घटनेमध्ये रिक्षाचालक , मेडिकल स्टोअरवाले , पत्रकार आणि स्थानिक नागरिकांनीही मोलाची मदत केली. यानंतर पुढील उपचारांसाठी आई आणि बाळाला लगेचच मिरा नर्सिंग होम येथे हलवण्यात आले. डॉक्टरांनी दिलेल्या माहितीनुसार सध्या दोघांचीही प्रकृती पूर्णपणे स्थिर आहे.
