उजनीवरील पाणी आणि वीज खाणारा प्रकल्प आम्हाला नकोच – रोहित पवार यांचा सरकारला इशारा
सोलापूर – सोलापूर जिल्ह्यातील उजनी धरण परिसरामध्ये प्रस्तावित असलेल्या नव्या औद्योगिक प्रकल्पांवरून सध्या मोठे राजकीय वादळ निर्माण झाले आहे. उजनी धरण येथे नव्याने उभारण्यात येणाऱ्या एआय डेटा सेंटर तसेच त्या अनुषंगाने येणाऱ्या इतर प्रकल्पांना सर्वपक्षीय नेत्यांनी तीव्र विरोध दर्शवला आहे. जे प्रकल्प जगाने नाकारले आहेत आणि शेजारील गुजरात राज्यानेही ज्यांना वाटाण्याच्या अक्षता लावल्या आहेत, असे घातक प्रकल्प आमच्या माथी मारले तर आम्ही ते खपवून घेणार नाही, अशी परखड भूमिका आमदार रोहित पवार यांनी जाहीरपणे मांडली. केवळ पाण्याचा आणि विजेचा अवाढव्य वापर करणाऱ्या या विनाशकारी प्रकल्पांऐवजी राज्याला सेमीकंडक्टरसारखे आधुनिक आणि रोजगारक्षम उद्योग आणावेत, अशी रास्त मागणी त्यांनी केली.
गेल्या काही महिन्यांपासून आमदार रोहित पवार हे राज्यातील ज्वलंत प्रश्नांवरून सातत्याने आंदोलने करत आहेत. याच साखळीतील पुढचे पाऊल म्हणून सोलापूर-पुणे राष्ट्रीय महामार्ग तब्बल चार तास पूर्णपणे रोखून धरण्यात आला. सकाळी साडेदहा वाजता सुरू झालेले हे रास्ता रोको आंदोलन अत्यंत लक्षवेधी ठरले. या आंदोलनामध्ये रोहित पवार यांच्यासोबत खासदार धैर्यशील मोहिते पाटील, माजी आमदार संजय शिंदे, राष्ट्रीय समाज पक्षचे अध्यक्ष महादेव जानकर, आमदार अभिजीत पाटील, आमदार नारायण पाटील तसेच नुकतेच पदवीधर मतदारसंघातून विजयी झालेले आमदार प्रतापसिंह पाटील यांनी सहभाग नोंदवला.
उजनी धरण क्षेत्रातील एआय डेटा सेंटर, ग्रीन हायड्रोजन प्रकल्प आणि स्मॉल मॉड्युलर रिॲक्टर हे तिन्ही प्रकल्प कोणत्याही परिस्थितीत पूर्ण होऊ देणार नाही, असा ठाम निर्धार रोहित पवार यांनी व्यक्त केला. राज्य शासनाने येत्या दोन महिन्यांच्या आत स्थानिक बाधितांची जनसुनावणी घ्यावी आणि जनतेच्या आग्रहाखातर हा प्रकल्प रद्द करावा. शासनाकडून नुकत्याच काढण्यात आलेल्या परिपत्रकात ग्रीन हायड्रोजन प्रकल्प आणि स्मॉल मॉड्युलर रिॲक्टर रद्द केल्याचा दावा करण्यात आला आहे. मात्र, मुख्यमंत्र्यांच्या सामंजस्य करारात या प्रकल्पांचा समावेश आहे. त्यामुळे प्रशासनातील अधिकाऱ्यांकडून दिशाभूल करणारी आणि खोटी माहिती पुरवली जात असल्याचा गंभीर आरोप रोहित पवार यांनी केला आहे. अशा बेजबाबदार अधिकाऱ्यांवर निलंबनाची कारवाई व्हावी, अशी मागणीही त्यांनी केली. याचवेळी पालकमंत्री जयकुमार गोरे यांच्या कार्यपद्धतीवर सडकून टीका करत हॉटेलमध्ये बसून कारभार पाहणारे आणि दमबाजीची भाषा करणारे पालकमंत्री जनतेच्या काय कामाचे, असा सवाल त्यांनी उपस्थित केला.
या संपूर्ण घटनाक्रमात खासदार धैर्यशील मोहिते पाटील यांनीही अत्यंत आक्रमक पवित्रा घेतला. शासनाने हा विनाशकारी प्रकल्प आमच्यावर जबरदस्तीने लादण्याचा प्रयत्न केल्यास यापेक्षाही तीव्र आंदोलन उभारले जाईल, असा थेट इशारा त्यांनी सरकारला दिला आहे. जोपर्यंत या प्रकल्पाची अधिकृत रद्दबातल घोषणा होत नाही, तोपर्यंत या जागेवर कोणतेही भूमिपूजन होऊ देणार नाही, असे ते म्हणाले. महादेव जानकर यांनीही या प्रकल्पाला कडाडून विरोध दर्शवला आणि सध्याच्या हुकूमशाही प्रवृत्तीच्या सरकारला सत्तेवरून खाली खेचण्यासाठी सर्वांनी एकत्र येण्याचे आवाहन केले. अखेर सोलापूरचे निवासी उपजिल्हाधिकारी स्वतः घटनास्थळी दाखल झाले. त्यांनी दिलेल्या आश्वासनानंतर सलग चार तास सुरू असलेले हे महामार्गावरील आंदोलन मागे घेण्यात आले.
