करमाळा ( आयुब शेख )अतिवृष्टीमुळे संकटात सापडलेल्या शेतकऱ्यांना महावितरणकडुन सन्मानाची वागणूक दिली जावी,मतदार संघातील वीजेची कामे वेळेत मार्गी लावावीत असे आदेश आमदार नारायण आबा पाटील यांनी महावितरणच्या संबंधित अधिकाऱ्यांना दिले. जेऊर ता.करमाळा येथे करमाळा मतदार संघातील महावितरण कडुन केल्या जाणाऱ्या कामांचा आढावा घेण्यात आला.या बैठकीच्या अध्यक्षस्थानी विद्यमान आमदार नारायण आबा पाटील होते तर यावेळी महावितरण कार्यकारी अभियंता श्री मगर(बार्शी) यांनी करमाळा व कुर्डुवाडी विभागाचा आढावा तपशीलवार माहितीसह सादर केला गेला.यानंतर शेकडो शेतकऱ्यांनी लेखी स्वरूपात निवेदन देऊन प्रत्यक्ष बोलून दाखवत आपल्या समस्या मांडल्या.यावर उप-अभियंता तसेच शाखा अभियंता यांनी समाधानकारक उत्तरे दिली व प्रश्न सोडवण्याचे आश्वासन दिले.यावेळी कार्यकारी अभियंता श्री.मगर यांनी सर्व अधिकारी व महावितरण कर्मचारी यांना सक्त ताकीद देऊन शेतकऱ्यांची कामे प्राधान्याने करण्यास सांगितले तसेच कामचुकारपणा केल्यास योग्य ती कारवाई केली जाईल असा इशारा दिला् शेवटी बोलताना आमदार नारायण आबा पाटील यांनी सांगितले की करमाळा मतदार संघातील सीनेकाठच्या गाव-शिवारातील अतिवृष्टीमुळे नुकसान झालेल्या शेतकऱ्यांना कामात प्राधान्य दिले जावे.महावितरण कार्यालयात काम घेऊन येणाऱ्या शेतकऱ्यांना सन्मानाची वागणूक दिली जावी.करमाळा मतदार संघातील वीजेबाबत मुलभुत सुविधा बळकट करण्यासाठी अधिकाऱ्यांनी विशेष प्रयत्न करावेत.अशा सुचना देऊन येत्या हिवाळी अधिवेशनात आपण वीजेच्या समस्या मांडणार असल्याचे ठाम आश्वासन दिले.जवळपास तीन तासाहुन अधिक काळ ही बैठक चालू होती.या बैठकीस करमाळा तालूक्यातील तसेच विशेष करुन करमाळा मतदार-संघास जोडलेल्या माढा तालुक्यातील पदाधिकारी,सरपंच,उपसरपंच तसेच कार्यकर्ते उपस्थित होते.उपस्थितांचे आभार ग्रामपंचायत सदस्य उमेश कांडेकर यांनी मानले.
