अक्कलकोट (प्रतिनिधी ) संभाजी ब्रिगेडचे प्रदेशाध्यक्ष पुरोगामी विचारवंत , संविधान, लोकशाहीवादी नेते प्रवीण दादा गायकवाड यांच्यावर अक्कलकोट येथे कार्यक्रमासाठी आले असता त्यांच्यावर भ्याड हल्ला करण्यात आला. या हल्ल्याच्या निषेधार्थ सकल मराठा समाज व बहुजन समाजाच्या वतीने दिनांक १८ जुलै रोजी अक्कलकोट बंदची हाक देण्यात आली असून या बंदला अक्कलकोट शहर व तालुक्यातील आंबेडकरवादी चळवळीतील पदाधिकारी, कार्यकर्ते यांचा जाहीर पाठिंबा असणार आहे अशी माहिती माजी सरपंच तथा आंबेडकरी चळवळीतील नेते रमेश बनसोडे यांनी पत्रकारांशी बोलताना दिले.
माजी सरपंच रमेश बनसोडे यांनी संभाजी ब्रिगेडचे प्रदेशाध्यक्ष थोर विचारवंत प्रवीण गायकवाड यांच्यावर दिनांक १३ जुलै रोजी श्री फतेसिंह शिक्षण संस्था अक्कलकोट व सकल मराठा समाज अक्कलकोट यांनी आयोजित केलेल्या श्री स्वामी समर्थ अन्नछत्र मंडळाचे संस्थापक अध्यक्ष जनमेजयराजे भोसले यांच्या नागरी सत्कारासाठी प्रमुख पाहुणे म्हणून उपस्थित राहण्यासाठी आले असता प्रियदर्शनी सांस्कृतिक भवन च्या आवारात त्यांच्यावर शाही फेकून मारहाण करत भ्याड हल्ला करण्यात आला .या निंदनीय घटनेचा आंबेडकरी चळवळीतील कार्यकर्ते व पदाधिकारी यांनी निषेध नोंदविला आहे. प्रवीण गायकवाड हे पुरोगामी , लोकशाही , संविधानवादी विचारवंत , नेते आहेत. त्यांचे काम हे राज्यातच नव्हे तर देशपातळीवर दखल घेतले गेले आहे. मराठा समाजासह बहुजन समाजाला शिव शाहू फुले आंबेडकरी चळवळीत आणण्याचे काम प्रवीण गायकवाड यांनी केले आहे. त्यांच्यावर अक्कलकोट येथे भ्याड जीवघेणा हल्ला होता करण्यात आला होता. हे अशोभनीय आहे. या प्रकरणातील हल्लेखोरांवर मकोका कायद्यान्वये गुन्हा दाखल करून कारवाई करण्यात यावी. सराईत गुन्हेगार असलेल्या हल्लेखोरांना मदत करणाऱ्यांची चौकशी करून त्यांच्यावर ही कारवाई करण्यात यावी अशी मागणी माजी सरपंच रमेश बनसोडे यांनी केली आहे. इतक्या मोठ्या व्यक्तीला कार्यक्रमास बोलावून आणत असताना त्यांच्या संरक्षणाची जबाबदारी ही कार्यक्रमांच्या आयोजकाची असते. गाफिल राहिल्यामुळेच प्रवीण गायकवाड यांच्यावर भ्याड हल्ला करण्याची सराईत गुन्हेगारांची मजल गेली असे मत माजी सरपंच रमेश बनसोडे यांनी व्यक्त केले. प्रवीण गायकवाड यांच्यावर झालेल्या हल्ल्याच्या निषेधार्थ सकल मराठा समाज व बहुजन समाज यांच्या वतीने दिनांक १८ जुलै रोजी पुकारण्यात आलेल्या अक्कलकोट बंदला अक्कलकोट तालुक्यातील आंबेडकरी चळवळीतील कार्यकर्त्यांचां जाहीर पाठिंबा असणार आहे असे माजी सरपंच रमेश बनसोडे यांनी सांगितले.
