उपमुख्यमंत्री सुनेत्रा पवार यांच्या विरोधात तब्बल १९ उमेदवारांचे अर्ज दाखल!
बारामती – राज्याचे माजी उपमुख्यमंत्री दिवंगत अजित पवार यांच्या निधनानंतर रिक्त झालेल्या बारामती विधानसभा मतदारसंघातील पोटनिवडणूक आता अत्यंत लक्षवेधी वळणावर येऊन ठेपली आहे. अजित पवार यांच्या पश्चात आता राष्ट्रवादी काँग्रेस पक्ष यांच्या वतीने सुनेत्रा पवार या निवडणूक लढवणार असल्याचे निश्चित झाले आहे. या महत्त्वपूर्ण पोटनिवडणूक प्रक्रियेसाठी येत्या २३ एप्रिल रोजी मतदान पार पडेल, तर ४ मे रोजी निकाल हाती येईल. सुनेत्रा पवार या अधिकृतरीत्या ६ एप्रिल रोजी आपला उमेदवार म्हणून अर्ज दाखल करणार आहेत. मात्र, त्यापूर्वीच बारामती मध्ये तब्बल १९ जणांनी आपले उमेदवारी अर्ज भरल्याने राजकीय वातावरण चांगलेच तापले आहे.
ओबीसी चळवळीचे आक्रमक नेते लक्ष्मण हाके हेदेखील या निवडणुकीच्या रिंगणात शड्डू ठोकण्याच्या तयारीत आहेत. ते अपक्ष लढणार की त्यांना कोणता पक्ष उमेदवारी देणार, हे अद्याप निश्चित झालेले नाही. त्याचप्रमाणे काँग्रेस पक्षाकडूनही आपला उमेदवार रिंगणात उतरवला जाण्याची दाट शक्यता वर्तवली जात आहे. त्यामुळे सध्याचे चित्र पाहता पोटनिवडणूक लढवणाऱ्या उमेदवारांची एकूण संख्या २० पेक्षा अधिक होऊ शकते.
अजित पवार यांच्या निधनानंतर ही निवडणूक शक्यतो बिनविरोध व्हावी, अशी भाजप व राज्याचे मुख्यमंत्री देवेंद्र फडणवीस यांची सदिच्छा होती. त्यांनी तशी इच्छाही बोलून दाखवली होती. परंतु, सद्यस्थिती बघता ही निवडणूक अजिबात बिनविरोध न होता अतिशय रंगतदार ठरणार असल्याचे स्पष्ट दिसत आहे. जरी सुनेत्रा पवार यांचे पारडे सध्या जड मानले जात असले, तरी लक्ष्मण हाके यांच्या संभाव्य सहभागामुळे बारामती च्या मैदानात लक्षवेधी चुरस आणि रंजक घडामोडी पाहायला मिळू शकतात.
आत्तापर्यंत ज्या १९ उमेदवारांनी अर्ज दाखल केले आहेत, त्यांची नावे पुढीलप्रमाणे आहेत. सतीश कदम (हिंदुस्तान जनता पार्टी), राघू घटुकडे (न्यू राष्ट्रीय समाज पार्टी) आणि अरुण निटुरे (राष्ट्रीय किसान बहुजन पार्टी) या पक्षीय उमेदवारांचा यात समावेश आहे. याशिवाय सागर भिसे, गजानन गवळी, त्रिशाला कांबळे, दिलीप अळोणी, दत्तात्रेय बेदरे, मिथुन आटोळे, रजाक मुलाणी, संदीप खरात, विलास होळकर, अभिजित बिचुकले, अनिल तुपे, संकेत गावडे, दादा थोरात आणि अभिजित कांबळे या अपक्ष उमेदवारांनीही आपले अर्ज भरून निवडणुकीत रंगत आणली आहे.
