पिंपरी चिंचवड ( अशोक शिवशरण )- डॉक्टर बाबासाहेब आंबेडकर चौक पिंपरी येथील डॉक्टर बाबासाहेब आंबेडकरांच्या स्मारकाच्या पाठीमागील मोकळ्या जागेवर माता रमाई आंबेडकर यांचे स्मारक व्हावे या मागणीसाठी आंबेडकर चौक पिंपरी येथे माता रमाई स्मारक समिती गेल्या आठ दिवसापासून बेमुदत धरणे आंदोलन करत आहे.
सदरचे आंदोलन धुराजी शिंदे व माता रमाई स्मारक समितीचे सर्व सदस्य यांच्यावतीने सुरू आहे.
या बेमुदत धरणे आंदोलनास संभाजी ब्रिगेड तसेच भीमशक्ती या सामाजिक संघटनेने सुद्धा पाठिंबा दिला आहे.
आज या आंदोलनाची दखल घेत पिंपरी चिंचवडचे माननीय आयुक्त शेखर सिंह यांनी आंदोलन स्थळावरुन आंदोलकांना आपली मागणी घेऊन शिष्टमंडळ भेटीस बोलावुन घेतले.
यावेळी आयुक्त शेखर सिंह यांनी शिष्टमंडळास येत्या पंधरा दिवसात शंभर टक्के निर्णय घेऊ व माता रमाई यांच्या स्मारकाचे काम मार्गी लावू असे आश्वासन दिले.
आयुक्तांना भेटलेल्या शिष्टमंडळात माता रमाई स्मारक समितीचे धुराजी शिंदे, अरुण मैराळे, दीपक वारभुवन, प्राध्यापक बीबी शिंदे, विकास चव्हाण.शिवाजी झोडगे ,सुरज गायकवाड तसेच वैभव जाधव व राजन नायर इतर सर्व रमाई समिती सदस्य उपस्थित होते.
तसेच यावेळी आंबेडकर चौक पिंपरी येथे सुरू असलेल्या बेमुदत धरणे आंदोलनाची दखल घेऊन माता रमाई स्मारकाच्या कामाचा ठामपणे निर्णय जोपर्यंत घेतला जात नाही तोपर्यंत सदरील आंदोलन सुरूच राहील असे माता रमाई स्मारक समितीच्या कार्यकर्त्यांकडून कळविण्यात आले.
