सोलापूर (प्रतिनिधी): “माऊली माऊली!” च्या जयघोषात संत ज्ञानेश्वर माऊलींच्या पालखी सोहळ्याचे आज सोलापूर जिल्ह्यात भावपूर्ण स्वागत करण्यात आले. सोमवारी सकाळी पालखीने धर्मपुरी येथून जिल्ह्यात प्रवेश केला. बरड (ता. फलटण) येथून नातेपुते मुक्कामी पालखीचे आगमन झाले.
टाळ-मृदंगाच्या गजरात आणि “विठ्ठल विठ्ठल” नामस्मरणात न्हालेल्या वातावरणात हजारो वारकऱ्यांनी भक्तिभावाने माऊलींचे स्वागत केले.
पालकमंत्री धर्मपुरी येथे सहकुटुंब उपस्थित राहून माऊलींच्या पालखीचे दर्शन घेतले व आशीर्वाद घेतले. यावेळी त्यांनी महाराष्ट्रातील जनतेच्या समृद्धीसाठी आणि समाधानकारक पर्जन्यमानासाठी प्रार्थना केली.
यावेळी उपस्थित माजी आमदार राम सातपुते, आमदार सचिन कल्याणशेट्टी, आमदार देवेंद्र कोठे, सोलापूरचे जिल्हाधिकारी कुमार आशिर्वाद, पोलीस अधीक्षक अतुल कुलकर्णी, जिल्हा परिषदेचे मुख्य कार्यकारी अधिकारी कुलदीप जंगम, अतिरिक्त जिल्हाधिकारी मोनिका सिंग ठाकूर, अतिरिक्त मुख्य कार्यकारी अधिकारी विजया पांगारकर, जिल्हा आरोग्य अधिकारी डॉ. संतोष नवले, तसेच शासन आणि प्रशासनातील अधिकारी व कर्मचारी मोठ्या संख्येने उपस्थित होते.
