5 जुलैच्या मराठी मोर्चात बंधूभेट, संजय राऊतांची घोषणा
मुंबई – हिंदीसक्ती आणि त्रिभाषा सूत्रविरोधात मनसे प्रमुख राज ठाकरे यांचा मोर्चा 5 जुलैला तर 7 तारखेला ठाकरे गटाचे प्रमुख उद्धव ठाकरे होणार होता. ठाकरे बंधूंचे दोन वेगवेगळे मोर्चे एकाच दिवशी काढण्यासाठी प्रयत्न सुरु होते. मनसे आणि ठाकरेंच्या शिवसेनेकडूनही यासाठी हालचाली सुरु होत्या. यानंतर आज ठाकरे गटाचे खासदार संजय राऊत यांनी मोठी घोषणा केली आहे. महाराष्ट्रातील शाळांमध्ये हिंदीसक्ती विरोधात एकच आणि एकत्र मोर्चा निघेल, अशी एक्स पोस्ट संजय राऊत यांनी केली आहे
मुंबईसह राज्यभरातील महापालिकांच्या निवडणूक रिंगणात उद्धव आणि राज हे दोघे ठाकरे बंधू एकत्र येण्याची शक्यता अद्याप चर्चेच्याही पातळीवर पोहोचली नसली तरी हिंदी सक्तीच्या विरोधात पुढील आठवड्यात मुंबईत निघणार्‍या सर्वपक्षीय मोर्चात हे बंधू एकत्र येण्याची चिन्हे आहेत. मराठीच्या मुद्द्यावर एकच मोर्चा निघावा, अशी भूमिका घेत उद्धव आणि त्यांच्या नेत्यांशी आम्ही चर्चा करणार असल्याचे राज यांनी गुरुवारी पत्रकार परिषदेत सांगितले होते.
सामानाच्या पहिल्याच पानावर आज उद्धव ठाकरेंच्या पत्रकार परिषदेच्या फोटोच्या बाजूला राज ठाकरे यांच्या पत्रकार परिषदेचा फोटो छापून “राज ठाकरे यांनी दादाचा भुसा केला” अशी बातमी सामनाने आज छापली आहे. सामनाच्या पहिल्याच पानावर ठाकरे बंधूंचा आजूबाजूला फोटो छापून हिंदी सक्ती आणि त्रिभाषा सूत्र विरोधी आंदोलनाची बातमी देण्यात आली आहे. हिंदीसक्ती आणि त्रिभाषा सूत्रविरोधात उद्धव ठाकरेंच्या भूमिकेच्या अगदी बाजूला राज ठाकरेंची भूमिकेची बातमी सामनाने आज छापली आहे.
