सामाजिक
सिन्नूर ग्रामपंचायतमध्ये सेवेवर नसणाऱ्या ग्रामसेवकाकडून रजिस्टरमध्ये उतारे नोंद, सरपंच श्रीमती कल्पना सोनकांबळे यांची चौकशीची मागणी
अक्कलकोट ( प्रतिनिधी )अक्कलकोट तालुक्यातील सिन्नूर ग्रामपंचायत मध्ये ग्रामसेवक कार्यालयात उपस्थित नसताना मागील ग्रामसेवक व क्लार्क यांनी संगनमताने आठ नंबर रजिस्टर मध्ये उतारे नोंद केले असून याची चौकशी करून संबंधितांवर कारवाई करण्याची मागणी सिन्नूर गावच्या सरपंच श्रीमती कल्पना सोनकांबळे यांनी अक्कलकोट पंचायत समितीचे गटविकास अधिकारी यांच्याकडे निवेदनाद्वारे केली आहे.
या निवेदनात मागील ग्रामसेवक सादिक वळसंगकर व क्लार्क शिवपुत्र जेवरगी यांनी अधिकार नसताना आठ नंबर रजिस्टर मध्ये अनेक जागेच्या नोंदी केल्या आहेत .जागेच्या नोंदी करण्यासाठी ग्रामस्थांकडून पैसे घेण्यात आले. स्वतः सरपंच श्रीमती कल्पना सोनकांबळे या कार्यालयात उपस्थित असताना दिनांक १४ ऑगस्ट रोजी मागील ग्रामसेवक सादिक वळसंगकर यांनी मनमानी करत आठ नंबर रजिस्टर मध्ये नावे नोंद केले असे निवेदन सरपंच श्रीमती कल्पना सोनकांबळे यांनी अक्कलकोट पंचायत समितीचे गटविकास अधिकारी शंकर कवितके यांना दिले आहेत. गावातील सेवाकाळ समाप्त झालेले मागील ग्रामसेवक व क्लार्क यांना ग्रामपंचायत मध्ये मनमानी कारभार करण्याचा अधिकार कोणी दिला असा सवाल सरपंच श्रीमती कल्पना सोनकांबळे यांनी केला आहे. मागासवर्गीय महिला सरपंच असताना कोणताही विचार न करता मागील ग्रामसेवक व क्लार्क यांनी माझ्या उपस्थितीमध्ये रजिस्टर मध्ये नाव नोंदवून माझा अपमान केला आहे. या प्रकरणाची सखोल चौकशी करून या दोघांवर गुन्हा दाखल करण्याची मागणी सरपंच श्रीमती कल्पना सोनकांबळे यांनी केला आहे. अन्यथा पंचायत समिती अक्कलकोट कार्यालयासमोर आत्मदहनाचा इशारा सरपंच श्रीमती कल्पना सोनकांबळे यांनी दिला आहे.
