अक्कलकोट :(प्रतिनिधी)
सोलापूर जिल्ह्यातील सामाजिक वनीकरण विभागांमध्ये शासनाच्या विविध योजनेत झालेल्या भ्रष्टाचाराची चौकशी व्हावी. अक्कलकोट सामाजिक वनीकरण विभागाच्या कामकाजाची केलेल्या चौकशी समितीची फेर चौकशी करण्याच्या मागणीसाठी लहुजी शक्ती सेनेच्या वतीने पश्चिम महाराष्ट्र अध्यक्ष महादेव भोसले यांच्या नेतृत्वाखाली मंगळवारी सामाजिक वनीकरण कार्यालयावर हलगीनाद आंदोलन करण्यात आले.
अक्कलकोट तालुक्यात सन २०१७ ते २०२३ दरम्यान सामाजिक वनीकरण विभागाच्या माध्यमातून झालेल्या रस्ता दुतर्फा, वृक्ष लागवड, गट लागवड, रोपवाटिका, एनटीपीसी यासह विविध शासकीय योजना अंतर्गत कोट्यावधींचा भ्रष्टाचार झाल्याचा आरोप लहुजी शक्ती सेनेने केलेला आहे. सप्टेंबर आणि डिसेंबर २०२३ मध्ये अक्कलकोट तालुक्यातील सामाजिक वनीकरण विभागातील भ्रष्टाचार तपासण्यासाठी चौकशी समितीचा दौरा दोन वेळेस झाला होता. मात्र चौकशी समितीच्या दौऱ्यात काहीही निष्पन्न झालेले नाही. या समितीने एनटीपीसीच्या विविध ठिकाणांना भेटी देऊन चौकशी केली नाही. स्थळ पाहणी नि:पक्षपातीपणे केली असती तर भ्रष्टाचाराचा भस्मासुर सापडला असता. त्यामुळे चौकशी समितीच्या भोंगळ कारभाराची सखोल चौकशी करून शासनाने पुन्हा नव्याने फेर चौकशीची करण्याची मागणी लहुजी शक्ती सेनेचे जिल्हाध्यक्ष वसंत देडे यांनी केलेली आहे. यावेळी बालाजी घोडके जिल्हा कार्याध्यक्ष परसू ऐवळे दक्षिण तालुका अध्यक्ष सोमनाथ कसबे मोहोळ तालुका अध्यक्ष अजय मोहिते सोलापूर शहर युवक अध्यक्ष भैया काळे मोहोळ युवक अध्यक्ष विकास डोलारे शहर उपाध्यक्ष श्याम रनधीरे आकाश डोलारे युवक शहर उपाध्यक्ष उपस्थित होते.
–
चौकट:-
सोलापूर जिल्ह्यात सामाजिक वनीकरण विभागात विविध योजनेत कोट्यावधींचा भ्रष्टाचार झालेला आहे जिल्ह्यातील काही अधिकाऱ्यांची आर्थिक गुन्हे शाखेकडून आर्थिक घोटाळ्याबाबत चौकशी सुरू असल्याचे समजते.सोलापूर येथील सामाजिक वनीकरण विभागासमोर हलगीनाद, केश मुंडन, अर्ध नग्न असे विविध आंदोलने २४ सप्टेंबर ते २७ सप्टेंबर दरम्यान संघटनेकडून करणार आहोत. न्याय न मिळाल्यास लवकरच विभागीय कार्यालय पुणे येथे तीव्र स्वरूपात आंदोलन करण्यात येइल.
(वसंत देडे, लहुजी शक्ती सेना, सोलापूर जिल्हा अध्यक्ष)
