८० लाख नागरिक रस्त्यावर
अमेरिका – अमेरिकेत राष्ट्राध्यक्ष डोनाल्ड ट्रम्प यांच्या धोरणांना विरोध दर्शवण्यासाठी शनिवारी भव्य अशा ‘नो किंग्स’ आंदोलनाचे आयोजन करण्यात आले होते. या ऐतिहासिक आंदोलनात तब्बल ८० लाख नागरिक रस्त्यावर उतरले. ट्रम्प प्रशासनाच्या वादग्रस्त निर्णयांचा निषेध नोंदवण्यासाठी देशभरात ३,००० पेक्षा अधिक ठिकाणी निदर्शने करण्यात आली. विशेषतः मिनेसोटा मध्ये लोकांनी इराण युद्ध आणि प्रशासनाचे कठोर इमिग्रेशन नियम याविरोधात आपला तीव्र संताप व्यक्त केला.
’नो किंग्स प्रोटेस्ट’ ची ही सलग तिसरी फेरी असून, गेल्या वर्षीही अमेरिकन नागरिकांनी याच घोषणेखाली लढा दिला होता. २०२५ मध्ये देखील ट्रम्प यांच्या हुकूमशाही निर्णयांना आणि स्थलांतर धोरणांना कडाडून विरोध झाला होता. आता पुन्हा एकदा लोक ट्रम्प यांच्या इराण युद्धाच्या निर्णयाविरुद्ध आक्रमक झाले आहेत. आयोजकांच्या मते, हा सर्व विरोध एका सुनियोजित राष्ट्रीय मोहिमेचा भाग असून, देशभरात ३,००० हून जास्त कार्यक्रम, रॅली आणि ट्रम्प प्रशासनाविरुद्ध पोस्टरबाजी करण्यात आली.
या महत्त्वपूर्ण आंदोलनात अनेक प्रसिद्ध व्यक्ती आणि सेलिब्रिटी सहभागी झाले. सेंट पॉल, मिनेसोटा येथील भव्य रॅलीत गव्हर्नर टिम वॉल्ज यांनी उपस्थित जनसमुदायाला संबोधित केले, तर सुप्रसिद्ध गायक ब्रूस स्प्रिंगस्टीन यांनी गाणी सादर केली. सोबतच सीनेटर बर्नी सँडर्स, जोन बेज, मॅगी रोजर्स आणि जेन फोंडा यांसारख्या प्रसिद्ध व्यक्तिरेखाही या मोर्चामध्ये सामील झाल्या होत्या.
मिनेसोटासह न्यूयॉर्क, वॉशिंग्टन, लॉस एंजेलिस, शिकागो आणि सॅन फ्रान्सिस्को यांसारख्या अत्यंत मोठ्या शहरांमध्ये हजारो नागरिक सामील झाले. त्यांनी स्पष्ट केले की, “अमेरिकेत कोणी राजा होत नाही, आम्ही सर्वजण एकत्र आवाज उठवत राहू आणि ट्रम्प यांना एखाद्या राजासारखे वागण्यापासून नक्कीच रोखणार आहोत.”
याच पार्श्वभूमीवर सीनेटर बर्नी सँडर्स म्हणाले, “आपण या देशाला हुकूमशाहीकडे जाऊ देणार नाही. कारण, अमेरिकेत जनता ही खरी सत्ताधारी आहे.” तर सीनेटर क्रिस्टिन गिलिब्रँड यांनी सांगितले की, “राष्ट्राध्यक्ष डोनाल्ड ट्रम्प यांनी स्वतःला राजा समजून विचार करू नये. त्याऐवजी त्यांनी देशातील लोकांबाबत विचार करणे आवश्यक आहे. त्यांनी महागाई कमी करण्यासाठी काम करणे आवश्यक आहे, आणि आरोग्यसेवा किफायतशीर बनवून प्रत्येक कुटुंब सहज जीवन जगू शकेल हे सुनिश्चित करावे.”
