पेशवाई गेली ॥
इंग्रजी माऊली आली ॥
निराशेचा गर्द अंधार
नरक स्वर्गाचे भय अनिवार
न्यूनगंडाचे मनी विचार
अशा या काळी, इंग्रजी माऊली आली ॥
दूर फेकुनि रूढी द्यारे
परंपरेची मोडुनि दारे
लिहीणे वाचणे शिकून घ्यारे
छान वेळ आली. इंग्रजी माऊली आली ॥
भटघमांच्या क्लृप्त्या नाना
अज्ञानामुळे शूद्रजनांना
पिळती छळती बहु तयांना
पेशवाई मेली…इंग्रजी माऊली आली ॥
भटशाहीचे राज्य जळाले
शहाणे इंग्रज विजयी झाले
शूद्र जनांना हित हे ठरले
मनुस्मृती मेली….इंग्रजी माऊली आली ॥
शूद्र जनांना ज्ञान सावली
अतिशूद्रांची पालनवाली
इंग्रज सत्ता सुखकर झाली
भयानकता गेली…इंग्रजी माऊली आली ॥
देश इंडिया नाही कुणाचा
इराणी ब्राम्हण यवन हुणांचा
असा खरा तो इंडि रक्ताचा
ठोक रे आरोळी…इंग्रजी माऊली आली ॥
– सावित्रीमाई फुले, १८५४ (काव्यफुले)
क्रांतिसूर्य सावित्रीमाई फुले यांच्या जयंती दिनी त्यांच्या विचार आणि कार्यास विनम्र अभिवादन
डॉ रेवत कानिन्दे यांच्या वॉल वरून
