शैक्षणिक
अक्कलकोट ग्रामीण रुग्णालयातील धन्वंतरी औषधी वनस्पती उद्यानात विद्यार्थ्यांचे श्रमदान
अक्कलकोट ( प्रतिनिधी )अक्कलकोट ग्रामीण रुग्णालयातील राष्ट्रीय आयुष अभियान धन्वंतरी औषधी वनस्पती उद्यानास विद्यार्थ्यांनी भेट देऊन श्रमदान केले. तसेच एक पेड मा के नाम ही संकल्पना राबविण्यात आली.
अक्कलकोट ग्रामीण रुग्णालयातील धन्वंतरी औषधी वनस्पती उद्यानास मंगरुळे प्रशाला व खेडगी कॉलेजमधील एनसीसीच्या विद्यार्थी विद्यार्थिनींनी भेट देऊन श्रमदानातून स्वच्छता केले. आयुष वैद्यकीय अधिकारी डॉक्टर सतीश बिराजदार यांनी सर्व विद्यार्थ्यांचे स्वागत करून त्यांना वनस्पती उद्यानातील विविध गुणकारी वृक्षांची माहिती दिली. ग्रामीण रुग्णालय अक्कलकोट येथील आवारात जवळपास ५० विविध प्रकारच्या वृक्षांची लागवड करण्यात आली आहे. यामध्ये शतावरी , शमी , आपटा , आवळा , अर्जुन , विटा ,सात प्रकारची तुळस , कवट ,बांबू भद्राक्ष , रुद्राक्ष ,गोकर्ण वेल , करवंद , गवती चहा , ऑल स्पायसी , तीन प्रकारचे लिंबू ,लाजाळू , अन्नपूर्णेश्वरी आदींसह विविध वनस्पती वृक्षांचे लागवड करण्यात आल्याची माहिती आयुष वैद्यकीय अधिकारी डॉक्टर सतीश बिराजदार यांनी दिली. वैद्यकीय अधीक्षक डॉक्टर अशोक राठोड यांच्या मार्गदर्शनाखाली सदरच्या वनस्पती उद्यानाची निर्मिती करण्यात आली आहे. यावेळी मंगरूळे प्रशालाचे मुख्याध्यापक नंदाजी कदम , शिक्षक डफले , ग्रामीण रुग्णालयातील कर्मचारी याबाजी , शंकर कुंभार , श्रीमती वानखडे सिस्टर , खेडगी महाविद्यालयाचे एनसीसी अधिकारी कॅप्टन डॉक्टर बी एन कोणदे आदींसह विद्यार्थी विद्यार्थिनी मोठ्या संख्येने उपस्थित होते.
