अक्कलकोट (प्रतिनिधी )अक्कलकोट शहरातील बासलेगाव रोड परिसरातील रस्ता रुंदीकरण करण्याची गरज निर्माण झाली असून अरुंद रस्त्यामुळे अपघात होण्याची शक्यता व्यक्त केली जात आहे. अक्कलकोट शहरातील बासलेगाव रस्ता हा अरुंद असून या रस्त्यावरून जड वाहनांची वर्दळ वाढली आहे. हजरत शेख नुरोद्दीन बाबा दर्गासमोरील रस्ता हा अरुंद असल्याने दोन मोठी वाहने या रस्त्यावरून जाऊ शकत नाहीत. तसेच दुचाकी वाहन चालकांना जीव मुठीत धरून बासलेगाव रस्त्यावरून जावे लागत आहे. बासलेगाव रस्त्यावरील परिसरात लोक वस्ती मोठ्या प्रमाणात वाढली आहे. चार चाकी आणि दुचाकी वाहनांची संख्या ही वाढली आहे. वाढती वाहनांची संख्या लक्षात घेता रस्ते अपघात टाळण्यासाठी बसले गाव रस्त्याचे रुंदीकरण करून वाहन चालकांना तसेच नागरिकांना दिलासा देण्याची मागणी नागरिकांतून केली जात आहे.
