मुंबई – ऑस्ट्रेलियाच्या हवामान विभागाने 15 सप्टेंबर रोजी प्रसिद्ध केलेल्या अहवालानुसार, प्रशांत महासागरातील एल निनोची स्थिती आणखी तीव्र होण्याची शक्यता आहे. सध्या निनो 3.4 निर्देशांक 2.51 अंश सेल्सिअसवर पोहोचला असून सप्टेंबर ते नोव्हेंबरदरम्यान समुद्राच्या तापमानात आणखी वाढ होण्याचा अंदाज आहे. डिसेंबर ते फेब्रुवारीदरम्यान हे तापमान सर्वोच्च पातळीवर पोहोचू शकते. अनेक हवामान प्रारूपांनुसार निनो 3.4 निर्देशांक 3 अंश सेल्सिअसपेक्षा अधिक जाण्याची शक्यता असून, एल निनोची स्थिती मार्च 2027 पर्यंत कायम राहू शकते. दरम्यान, हिंदी महासागर द्विध्रुव म्हणजेच आयओडीचा निर्देशांक 13 सप्टेंबरला संपलेल्या आठवड्यात 0.65 अंश सेल्सिअस नोंदवला गेला. मात्र, एका आठवड्याच्या आकडेवारीवरून सकारात्मक आयओडी अधिकृतपणे सुरू झाल्याचे मानता येत नसल्याचे विभागाने स्पष्ट केले आहे. वातावरणीय स्थितीतही एल निनोचे संकेत दिसत असून मागील 30 दिवसांचा एसओआय उणे 18.5 नोंदवला गेला. याशिवाय प्रशांत महासागरातील व्यापार वारे कमकुवत होणे आणि ढगांच्या प्रमाणात बदल झाले आहेत. ऑस्ट्रेलियाच्या अनेक भागांभोवती समुद्राचे तापमान सरासरीपेक्षा जास्त आहे. विशेषतः दक्षिण न्यू साउथ वेल्स आणि तस्मानियाजवळ तापमान 2 ते 3 अंशांनी अधिक होते. ऑगस्टमध्ये जागतिक समुद्राचे तापमानही विक्रमी पातळीवर पोहोचल्याचे अहवालात नमूद करण्यात आले आहे.
