पुणे ( प्रतिनिधी ) दिनांक 14 ऑक्टोबर 2024, भारतीय समाजाच्या इतिहासातील अत्यंत महत्त्वाचा दिवस आहे. याच दिवशी 68 वर्षांपूर्वी, डॉक्टर बाबासाहेब आंबेडकरांनी लाखो दलित, शोषित आणि उपेक्षित वर्गाला मानवतेचा, समतेचा मार्ग दाखवून एक नवीन युगाची सुरुवात केली होती. या ऐतिहासिक घटनेच्या स्मरणार्थ, सावित्रीबाई फुले पुणे विद्यापीठात धम्मचक्र प्रवर्तन दिन मोठ्या उत्साहात साजरा करण्यात आला.
या विशेष प्रसंगी, महात्मा तथागत बुद्ध, डॉक्टर बाबासाहेब आंबेडकर, छत्रपती शिवाजी महाराज, महात्मा फुले, सावित्रीबाई फुले आणि इतर अनेक महामानवांना आदरपूर्वक अभिवादन करण्यात आले. कार्यक्रमामध्ये संविधानाचे गाढे अभ्यासक सागर सोनकांबळे, पाली विभागातील संशोधक जयकर गायकवाड, आंबेडकर चळवळीतील अग्रणी आणि बुद्ध सेवा संघाचे युवराज भोसले, सिद्धांत जांभुळकर, विकास अवचार यांच्यासह विद्यापीठातील विविध विभागांच्या विद्यार्थ्यांनी आपल्या विचारांचे मंथन केले.
या कार्यक्रमाचे मुख्य आयोजक, चळवळीतील बुलंद आवाज राहुल ससाने, सागर सोनकांबळे, सिद्धांत जांभुळकर ,सुशांत दराडे, समाधान दुपारगुडे, रोहित भामरे, दगडू सोनकांबळे, हुसेफा शेख आणि ओंकार बिनवडे.आदी उपस्थित होते.
