राजकीय
तीर्थक्षेत्र अक्कलकोट नगरीच्या विकासाच्या नव्या कारभाऱ्यांकडून अपेक्षा वाढल्या !
अक्कलकोट ( प्रतिनिधी ) अक्कलकोट नगरीच्या नगराध्यक्ष पदाची सूत्रे भारतीय जनता पार्टीचे युवा नूतन नगराध्यक्ष मिलन कल्याणशेट्टी यांनी स्वीकारली आहेत. तसेच उपनगराध्यक्ष पदाची निवड करण्यात आली. अक्कलकोट नगरीच्या विकासाचे नव्या कारभाऱ्यांसमोर आव्हान असून आता अक्कलकोटकरांच्या अपेक्षा वाढल्या आहेत.
अक्कलकोट नगर परिषदेच्या सार्वत्रिक निवडणुकीत थेट नगराध्यक्ष पदासह २२ सदस्य भारतीय जनता पार्टीचे निवडून आले आहेत. थेट नगराध्यक्ष म्हणून युवा नेते मिलन कल्याणशेट्टी हे मोठ्या मताधिक्याने विजयी झाले आहेत. नूतन नगराध्यक्ष मिलन कल्याणशेट्टी यांनी दिनांक १२ जानेवारी रोजी पदभार स्वीकारला. तसेच उपनगराध्यक्षपदी युवा नेते ऋतुराज उर्फ बंटी राठोड यांची निवड करण्यात आली. अक्कलकोट नगर परिषदेच्या निवडणुकीत मतदारानी भाजपाला बहुमताने सत्ता दिली आहे. अक्कलकोटकरांच्या नव्या कारभाऱ्यांकडून विकासाच्या अपेक्षा वाढल्या असून अक्कलकोट शहराच्या विकासाचे नव्या कारभाऱ्यांसमोर आव्हान असणार आहे. अक्कलकोट शहराचा पाणी प्रश्न , स्वच्छता , रस्त्यांची दुरावस्था , मूलभूत सुविधांचा उडालेला बोजवारा , तीर्थक्षेत्र आराखडा विकास , मंदिर परिसर व समाधी मठ परिसराचा विकास , शहरातील रस्ते रुंदीकरण ,परगावच्या भाविकांना सुविधा पुरविणे अशा अनेक समस्या शहराला भेडसावीत आहेत .अक्कलकोट शहरात विकासाची कामे सुरू आहेत. पण ही कामे अत्यंत संथगतीने सुरू आहेत. या कामांमुळे नागरिकांना वेठीस धरण्याचा प्रकार सुरू आहे. शहरात अनेक कामांसाठी रस्ते खोदण्यात आले आहेत. यामुळे सर्वत्र धुळीचे साम्राज्य पसरले आहे. धुळीमुळे अबालवद्धानां अनेक आजारांना सामोरे जावे लागत आहे. तीर्थक्षेत्र अक्कलकोट शहरात श्री स्वामी समर्थांच्या दर्शनासाठी दररोज हजारो परगावचे भाविक भक्त हे येत असतात. शहरात आल्यानंतर परगावच्या भाविकांना वाहन पार्किंगची समस्या मोठ्या प्रमाणात भेडसावीत आहे. गर्दीच्या वेळी शहरातील वाहतुकीची कोंडी मोठ्या प्रमाणात होत आहे. अक्कलकोट शहराचा पाणीपुरवठ्याचा प्रश्न ऐरणीवर आहे. अक्कलकोट शहरात कुरनूर धरणातून पाणीपुरवठा सुरू आहे. आजच्या वेळी कुरनूर धरणात मुबलक पाणी असूनही अक्कलकोट शहरात आठ ते दहा दिवसाआड पाणीपुरवठा सुरू आहे. म्हणजे महिन्यातून केवळ तीन ते चार वेळाच पाणीपुरवठा सुरू आहे. अक्कलकोट शहरातील रस्त्यांची मोठी दुरावस्था झाली आहे. अक्कलकोट शहरातील स्वच्छतेबाबत नागरिकात तक्रारी वाढले आहेत. अक्कलकोट शहरातील अनेक भागात अंधाराचे साम्राज्य पसरले आहे. अक्कलकोट शहरातील मूलभूत समस्यांकडे प्रशासकीय काळात दुर्लक्ष करण्यात आले. आता नव्या नगराध्यक्ष ,उपनगराध्यक्ष व सर्वपक्षीय नगरसेवकांकडून नागरिकांच्या शहर विकासासंदर्भात अपेक्षा वाढल्या आहेत. तीर्थक्षेत्र अक्कलकोट नगरीचा विकास हा राज्यातील इतर तीर्थक्षेत्रांच्या धरतीवर व्हावा यासाठी नूतन नगराध्यक्ष मिलन कल्याणशेट्टी यांना प्रयत्न करावे लागणार आहेत. अक्कलकोट विधानसभेचे आमदार सचिन कल्याणशेट्टी यांनी अक्कलकोट शहराच्या विकासासाठी शासनाकडून कोट्यावधी रुपयांचा निधी मंजूर करून घेतला आहे. अक्कलकोट शहरात तीर्थक्षेत्र विकास निधीतून कामे सुरू आहेत. अक्कलकोट शहराच्या विकासासाठी आमदार सचिन कल्याणशेट्टी यांनी प्रामाणिक प्रयत्न केले आहेत. आता शहराच्या नव्या कारभाऱ्यांना शहरात जी कामे सुरू आहेत त्यांचा दर्जा पाहणे तसेच सदरची कामेही मुदतीत होण्यासाठी प्रशासनावर दबाव टाकण्याचे काम करावे लागणार आहे. आमदार सचिन कल्याणशेट्टी यांच्या नेतृत्वाखाली नूतन नगराध्यक्ष मिलन कल्याणशेट्टी व त्यांच्या सहकाऱ्यांना अक्कलकोट शहर विकासाचे आव्हान पेलावे लागणार आहे.अक्कलकोट नगर परिषदेत सर्वपक्षीय सदस्य तसेच नगराध्यक्ष हे उच्चशिक्षित असून या सर्वच लोकनियुक्त सदस्यांकडून अक्कलकोटकराच्यां विकासा संदर्भात अपेक्षा वाढल्या आहेत.
